Ourense, Galiza, 1979
Cun achegamento autodidacta ao medio fotográfico, Berto Macei finaliza posteriormente os seus estudos de Fotografía Artística na Escola de Arte e Superior de Deseño Antonio Faílde de Ourense, ademais de complementar a súa formación con diversos cursos e obradoiros.
Utiliza a fotografía como un medio de expresión persoal, afondando nun documentalismo subxectivo que rexistra o mundo contemporáneo que o rodea. Un diario visual que configura como documento propio e que representa unha visión particular da realidade que transcende a mera enunciación de contidos tratando de ampliar os seus límites.
No ano 2014 recibe o Premio Galicia de Fotografía Contemporánea na súa II edición, premio outorgado no marco do 32º Festival Outono Fotográfico.
Participou en diversas exposicións e festivais entre os que destacan os Encontros da Imagen 2015 en Braga (Portugal) ou a 6ª International Triennial of Fine Arts de Istanbul, entre outras.